ایبٹ آباد(سٹاف رپورٹر)چیئرمین صوبہ ہزارہ تحریک سردار محمد یوسف نے کہا ہے کہ صوبہ کے پی کے کا نام پختونخواہ رکھنے سے پہلے ہزارہ صوبہ بنایاجائے۔ایمل ولی خان کی طرف سے نام کی تبدیلی پر ہزارہ میں شدید ردعمل پایاجاتاہے۔ان خیالات کا اظہارانہوں نے گڑھی حبیب اللہ میں مرکزی کوآرڈی نیٹر پروفیسر سجاد قمر کے ہمراہ ایک ہنگامی پریس کانفرنس سے خطاب کرتے ہوئے کیا۔اس موقع پر انجمن تاجران کے صدر، جنرل سیکرٹری سردارسعید ناظم خالد خان اوردیگر موجود تھے۔سردار محمد یوسف نے کہا کہ صوبہ ہزارہ تحریک ہزارہ کے عوام کی ترجمان ہے اور دودن سے ہزارہ کے عوام میں شدید اضطراب پایا جاتا ہے۔ 2010 میں صوبہ کے نام کی تبدیلی کے موقع پر ہزارہ کے سات فرزندان نے اپنی جانیں قربان کی تھیں۔ہم ان کو کسی صورت فراموش نہیں کر سکتے اور ایسی کسی ترمیم کو ہم نہیں قبول کریں گے۔ ہمارا مطالبہ نسلی یا لسانی بنیادوں پر نہیں بلکہ انتظامی بنیاد پر ہے اورہم چاہتے ہیں کہ پورے ملک میں انتظامی بنیادوں پر صوبے بنانے جاہیں۔سردار محمد یوسف نے کہا کہ صوبہ خیبر پختونخواہ کی اسمبلی دو دفعہ صوبہ ہزارہ کی قرارداد منظور کر چکی ہے۔ ہم کوئی بلیک میلنگ کی سیاست نہیں کرناچاہتے لیکن ہم اپنے شہدا کی قربانیوں کو کسی صورت فراموش نہیں کرنے دیں گے۔مرکزی کوآرڈینیٹر پروفیسر سجاد قمر نے کہا کہ صوبہ ہزارہ تحریک کی سینیر قیادت سے رابطے کر رہے ہیں۔سینیٹر طلحہ محمود،اعجاز علی خان درانی، عبدالرزاق عباسی، زر گل خان، پرنس فضل حق سے بات ہو چکی ہے۔پاکستان تحریک انصاف سمیت ہزارہ کی قیادت سے رابطے کر رہے ہیں۔ بدھ کو ہنگامی اجلاس منعقد کیاجائے گا اور اس میں لایہ عمل طے کیا جائے گا۔مرکزی کوآرڈینیٹر پروفیسر سجاد قمر نے بتایا کہ راولپنڈی اسلام آباد کی تمام تنظیموں کو ہدایت کر دی گئی ہے کہ وہ اپنے اجلاس منعقد کریں اورآئندہ لائحہ عمل کی پلاننگ کریں