نئی دہلی، بھارت میں دو مقامات پر بادل پھٹنے سے تباہی، 4 افراد ہلاک، 8 فوجیوں 50 سے زائد لاپتہ

نئی دہلی(آئی آئی پی) بھارتی ریاست اتراکھنڈ کے ضلع اترکاشی میں منگل کو دو الگ الگ مقامات پر بادل پھٹنے کے واقعات میں شدید جانی و مالی نقصان کی اطلاعات ہیں۔ سکھ ٹاپ اور دھرالی کے علاقوں میں ہونے والی موسلا دھار بارش کے بعد آنے والے شدید فلیش فلڈ سے اب تک کم از کم چار افراد ہلاک ہو چکے ہیں جبکہ 50 سے زائد افراد لاپتہ ہیں۔دی ہندو کے مطابق دھرالی قصبے میں سطح سمندر سے 8600 فٹ کی بلندی پر واقع ہوٹلوں اور رہائشی عمارتوں کو خیر گنگا ندی میں آنے والی طغیانی نے اپنی لپیٹ میں لے لیا، جس سے متعدد افراد بہہ گئے۔دوسری جانب سکھ ٹاپ کے سیاحتی علاقے میں بھی بادل پھٹنے کا واقعہ رپورٹ ہوا ہے، جہاں لگ بھگ 40 سے 50 مکانات بہہ گئے ہیں۔ نیشنل ڈیزاسٹر ریسپانس فورس (NDRF) کے ڈپٹی انسپکٹر جنرل محسن شہیدی کے مطابق، علاقے میں ریسکیو آپریشن جاری ہے اور اب تک انڈو تبت بارڈر پولیس (ITBP) کی جانب سے 37 افراد کو بحفاظت نکال لیا گیا ہے۔ہرسل کے نچلے علاقے میں قائم فوجی کیمپ سے بھی کم از کم 8 فوجی اہلکاروں کے لاپتہ ہونے کی اطلاعات ہیں۔ حکام نے بتایا ہے کہ ملبے تلے مزید افراد دبے ہونے کا خدشہ ہے اور امدادی ٹیمیں متاثرہ علاقوں تک پہنچنے کی کوشش کر رہی ہیں۔ریسکیو اہلکاروں کو خراب موسم، مٹی کے تودے اور سڑکوں کی بندش جیسے مسائل کا سامنا ہے۔ مقامی انتظامیہ نے عوام سے متاثرہ علاقوں سے دور رہنے کی اپیل کی ہے۔